FHN

Salyan rayonunda baş verən ağır yol-nəqliyyat hadisəsi bir ailəni və bütün fövqəladə hallar sistemini yasa boğdu. Xidməti vəzifəsini yerinə yetirən Fövqəladə Hallar Nazirliyinin əməkdaşı yanğının söndürülməsi zamanı avtomobil qəzası nəticəsində həyatını itirib.

Hadisə 21 fevral 2026-cı il tarixində səhər saat 06:00 radələrində Bakı–Astara magistral yolunda qeydə alınıb. İlkin məlumata görə, magistral yolda avtomobildə yanğın baş verib. Əraziyə dərhal FHN-in Dövlət Yanğından Mühafizə Xidmətinin əməkdaşları cəlb olunub və alovun qarşısının alınması istiqamətində tədbirlər görülüb.

Yanğının söndürülməsi əməliyyatı davam etdiyi vaxt hərəkətdə olan yük avtomobili hadisə yerində çalışan əməkdaşları vurub. Nəticədə 1984-cü il təvəllüdlü Şirvan Şəhər Yanğından Mühafizə Dəstəsinin əməkdaşı Piriyev Hakim Şahlar oğlu aldığı ağır xəsarətlərdən hadisə yerində həyatını itirib.

Digər əməkdaş — 1989-cu il təvəllüdlü Tağıyev Elşən İsan ağa oğlu isə müxtəlif dərəcəli bədən xəsarətləri alıb. Həkimlərin verdiyi məlumata əsasən, onun həyati təhlükəsi yoxdur və müalicəsi davam etdirilir.

Hadisə ilə bağlı araşdırma başladılıb. Yol hərəkəti təhlükəsizliyi və fövqəladə hallara müdaxilə zamanı təhlükəsizlik qaydalarına riayət olunmasının vacibliyi bir daha gündəmə gəlib. Xüsusilə magistral yollarda fövqəladə xidmət əməkdaşlarının çalışdığı ərazilərdə sürücülərin daha diqqətli və məsuliyyətli davranması zəruridir.

Qeyd edək ki, fövqəladə hallar əməkdaşları hər gün həyatlarını riskə ataraq vətəndaşların təhlükəsizliyi naminə xidmət edirlər. Bu cür faciələr isə cəmiyyət üçün ciddi xəbərdarlıq siqnalı kimi qiymətləndirilir.

Faktla bağlı hüquq-mühafizə orqanları tərəfindən istintaq tədbirləri davam etdirilir.