İran müharibəsində gərginlik artır

ABŞ-ın İrana qarşı son zərbələri mülki əhali arasında itkilərlə bağlı narahatlığı yenidən gündəmə gətirib.

Xeberbaku.com xəbər verir ki, İran tərəfinin verdiyi məlumata görə, son hücumlarda 18 nəfər ölüb, 108 nəfər yaralanıb. Ölənlər arasında Hörmüz boğazı yaxınlığında toy mərasimində olan 4 nəfərin də olduğu bildirilir.

İran Qızıl Aypara Cəmiyyəti toy mərasiminə zərbə nəticəsində 4 nəfərin öldüyünü, 67 nəfərin yaralandığını açıqlayıb.

ABŞ Mərkəzi Komandanlığının nümayəndəsi Tim Hokins isə bildirib ki, ABŞ ordusu mülki şəxsləri hədəf almır.

BMT-nin baş katibi Antonio Quterreş İrandakı mülki itkilərlə bağlı xəbərlərdən “dərindən narahat olduğunu” bildirib və hərbi əməliyyatların dərhal dayandırılmasına çağırıb. O, bütün tərəflərin beynəlxalq humanitar hüququn tələblərinə əməl etməli olduğunu vurğulayıb.

Bu arada İran ABŞ-ın Bəhreyn, İordaniya, Küveyt və İraqdakı obyektlərinə raket və dron hücumları həyata keçirib. Küveyt ordusu cümə axşamı səhər yeni raket və dron hücumlarının qarşısının hava hücumundan müdafiə sistemləri tərəfindən alındığını açıqlayıb.

ABŞ Prezidenti Donald Tramp isə hərbi gücdən daha geniş istifadə edə biləcəyi barədə xəbərdarlıq edib. Bildirilir ki, Trampın əsas müşavirləri noyabrda keçiriləcək aralıq seçkilərindən əvvəl müharibənin daha da genişlənməsinin qarşısını almağa çalışırlar. Bununla belə, seçkilərdən sonra hərbi əməliyyatların gücləndirilməsi məsələsinə baxıla bilər.

Müharibənin əvvəlki mərhələsində İranda minlərlə insanın öldüyü bildirilir. İnsan Haqları Fəallarının məlumatına görə, aprelin 7-dək İranda 3 636 nəfər həlak olub, onlardan 1 701-i mülki şəxslərdir.

İran isə ABŞ-ın hücumlarına cavab olaraq Hörmüz boğazından keçən neft tankerlərinə qarşı sərt tədbirlər görəcəyi ilə hədələyib. Müharibədən əvvəl dünya neft tədarükünün təxminən 20 faizi bu su yolu vasitəsilə həyata keçirilirdi.