Xərçəngə qarşı vaksin sınaqlarda ümidverici nəticə göstərdi

“Moderna” və “Merck” şirkətlərinin hazırladığı fərdiləşdirilmiş mRNT əsaslı xərçəng vaksini melanomaya qarşı III faza klinik sınaqda əsas göstəricilər üzrə müsbət nəticə verib.

Xeberbaku.com xəbər verir ki, şirkətlərin açıqlamasına görə, intismeran autogene adlı preparat “Merck”in “Keytruda” immunoterapiyası ilə birlikdə istifadə edildikdə melanomanın yenidən yaranması və başqa orqanlara yayılması riskini azaldıb.

III faza klinik sınaqda əməliyyatla şişi tam çıxarılan II B–IV mərhələ melanoması olan 1 137 xəstə iştirak edib. Sınağın əsas məqsədi müalicənin xəstəliyin geri qayıtmasının və metastazların qarşısının alınmasına təsirini qiymətləndirmək olub. İlkin nəticələr hər iki göstərici üzrə müsbət olub.

Bu preparat klassik vaksinlərdən fərqlənir. Məqsəd sağlam insanı xərçəngdən qorumaq deyil, artıq xərçəng diaqnozu qoyulmuş xəstələrdə xəstəliyin yenidən yaranmasının qarşısını almaqdır.

Preparat hər xəstə üçün fərdi şəkildə hazırlanır. Əvvəlcə xəstənin şişindəki genetik dəyişikliklər müəyyən edilir. Daha sonra vaksin immun sisteminə həmin xərçəng hüceyrələrini tanımaq və onlara hücum etmək üçün “təlimat” verir.

mRNT texnologiyası COVID-19 vaksinlərindən sonra geniş tanınıb. İndi isə eyni texnologiyanın xərçəng müalicəsində tətbiqi araşdırılır.

“Moderna” və “Merck”dən bildiriblər ki, preparatın əvvəlki klinik sınaqlarında da müsbət nəticələr əldə olunub. Bununla belə, yeni III faza sınağının bütün detalları hələ açıqlanmayıb.

Preparat hazırda eksperimental mərhələdədir və geniş istifadəyə icazə verilməyib. Şirkətlər onun ağciyər, sidik kisəsi və böyrək xərçəngi kimi digər xəstəliklərdə də tətbiq imkanlarını araşdırırlar.

Yeni nəticələr xərçəng müalicəsində fərdiləşdirilmiş mRNT texnologiyasının gələcəyinə dair ümidləri artırıb. Lakin mütəxəssislər preparatın effektivliyi və uzunmüddətli nəticələri barədə yekun fikir söyləmək üçün tam klinik məlumatların açıqlanmasını gözləyirlər.